本周二情人節，《頭條日報》的一篇獨家娛樂報道「72歲李龍基今年再婚低調唔擺酒 跟細36年女友性生活好協調」見街後被瘋傳，全港網媒齊follow，網民留言又Mean又有創意，連肥媽都躺著也中槍，「今次真係不要金不要銀只要一碌棍？？」、「皇上，保重龍體呀」、「玉皇大帝」、「72歲結婚都係想快啲屎」、「半年後可能會喺東張西望見到佢話比人呃晒啲錢乜都無晒好慘」、「無問題，到時咪好似肥媽咁開演唱會籌旗之後再玩過第二條女囉」、「女方的老豆（竇）真係慘」及「老人x嫰x，好過食燉雞」等等，笑死人咩! 採訪:方騫平
既然Part 1咁受歡迎，《星島頭條》記者即將Part 2「緣份好奇妙之港鐵相識篇」上架。72歲嘅李龍基有心有力，4年前搵到第二春，跟36歲嘅Chris Wong譜出「爺孫戀」後跟妻子分開，雖然基哥年紀較Chris大36年，但兩人有影皆雙黐到實，行埋以嚟冇分開過，基哥仲話兩人喺性生活上完全冇代溝，呢方面自己喺實際行動上見真章，絕對有料到，實牙實齒「堅嘢嚟」咁話，知嘞知嘞，更冧豬豬話「老婆」平時喺各方面都照顧得佢好好。
放電「肉」照任睇
呀準李太自稱喺美國長大，去過荷蘭及日本求學，亦是業餘飛機師、藝術家，平時除咗做跟得「夫人」外，仲會教小朋友寫書法及繪畫！而記者從Chris社交網站可見，有唔少拋眉弄眼，張嘴翹臀，低胸性感，係咁放電嘅「肉」照，豐乳加強勁電力，難怪見慣世面的李龍基都被俘虜。
情人節當日的獨家報道見街後，網民開po熱討：「72歲李龍基和細36歲女友…阿伯都媾到女，叫單身狗們情何以堪？」其實「阿伯都媾到女」呢句係大錯特錯，皆因基哥今次係俾女媾。
緣份由天註定
採訪當日，《星島頭條》記者追問兩人相識經過，兩人興奮地你一句我一句，原來兩人10年前已認識。基哥半帶笑說：「我哋喺灣仔港鐵站認識㗎，當時我哋對望，緣份就係咁註定喇…」Chris和應：「係呀，嗰次我去完內地參加朋友婚禮，留港一晚翌日轉機返福岡(上學)，咁啱喺港鐵站見到佢好面善，好似係一位我認識嘅朋友，咁當然最後係認錯人啦，之後我返咗去日本，大家再冇聯絡喇。」基哥再接住說：「直至幾個月後佢打畀我話嚟咗香港，因為感冒唔舒服，佢又人生路不熟，所以由我帶佢去養和醫院睇醫生…(去醫院睇感冒？)咁媾女梗係要重手啲啦…」Chris開心表示：「嗰晚佢帶咗我去一間五星級酒店食飯，其實當時我唔知佢係藝人，好奇怪點解個個都識佢？咁多侍應猛問『李生今晚想食乜？』」語畢，Chris強調當日食完飯冇上房，冇下文。不過，當記者追問兩人在灣仔偶遇後，為何會交換聯絡電話？既然之後冇聯絡，Chris來港時身體不適為什麼會第一時間諗起搵基哥？而且基哥當年仲係已婚男喎。對此，基哥只用尷尬而不失禮貌的微笑回應，一切盡在不言中。
3年前曾經小產
基哥同Chris行埋4年多，日日都超開心，Chris會為基哥整愛心早餐，用麵包夾夾出星形青提，為他揀選衣服，讓他立刻回春，開心仔基哥說：「佢有佢缺點，我哋互相包容，我哋話題同興趣都一樣完全冇代溝㗎，雖然佢咁後生，但鍾意聽貓王（Elvis Presley）啲英文歌，又會夏天熱住陪我放飛機，有邊個女仔願意咁做呀？佢又好鍾意留喺屋企，佢咁後生周圍去wet我就大鑊，呢個緣份好似上天安排咁，而且我哋性生活都好協調，我身體都好健康…」儘管有心有力，基哥話Chris唔太喜歡細路，而且3年前曾小產過：「大吉利是有咗咪順其自然，到時先算囉，講真我呢個年紀所有嘢都順其自然，勉強唔到。」
《星島頭條》APP經已推出最新版本，請立即更新，瀏覽更精彩內容：http://www.stheadline.com/
【延伸閱讀】：
獨家丨72歲李龍基今年再婚低調唔擺酒-跟細36年女友性生活好協調
李龍基嫩妻畫祝枝山送陳百祥-深得圈中前輩愛錫同白姐姐出雙入對
